曾於經典處境劇《香港81》中飾演「陳積」嘅顏國樑，前年罕有現身TVB 55周年台慶時自揭患上第三期聲帶鱗狀細胞癌，樂觀嘅佢積極對抗癌魔，接受化療及免疫治療。日前佢接受好友鄧英敏訪問，雖然佢喺鏡頭面前談笑風生，不過原來佢喺今個月6日入院，仲留醫半個月，啱啱走出鬼門關。

鄧英敏YouTube頻道「老友鬼鬼」邀請顏國樑擔任嘉賓，曾經接受化療而脫髮嘅佢，而家已經生返一頭白髮，睇落雖然略帶憔悴，不過依然中氣十足。鄧英敏表示過去13個月顏國樑多次進出醫院，大家見到而家嘅顏國樑龍精虎猛，其實佢喺呢個月6日入醫院，留醫咗半個月，啱啱喺訪問前兩日先出院。顏國樑就話「變化好大，呢段時間入面，喺人生嚟講都幾坎坷嘅，我就諗起當年後生，即係30零至40歲黃金時間，唔可以話係花天酒地，不過可以話去見識吓，搵到啲鬆動錢，就學人去享受下，去沖涼及揼骨，而態度亦非常之好。如果去高檔次嘅地方，仲會有人幫埋沖涼洗頭兼換衫，嗰陣時係唔識得欣賞呢啲。但人年紀老同病痛多，呢樣服務就好重要，原來呢個時間服務你呢，你就覺得值錢！...有個大醫生講過，70歲人仲可以喺洗手間瀟洒走一回出嚟，恭喜你呀！」

之後，佢再話自己曾幾次走出鬼門關：「我喺鬼門關出入過幾次，嗰陣係唔覺嘅，次次都係事後聽啲醫生講先知，有一次入去浸會留醫，醫生都講諗住你出唔到去，後來又有幾次，忽然間好辛苦，抖氣唔得。因為我裝咗個支架去協助呼吸，醫生話要做手術，唔做手術嘅話會唞唔到氣，但係做手術嘅話就有機會死，好彩手術成功後去加護病房。事後姑娘都話係好危險，只要3分鐘救你唔到，你就會走㗎啦。」

喺呢個經驗後，顏國樑只要感到呼吸辛苦，佢都會打999叫救護車送往北區醫院：「朝頭早10點零鐘，嗰時係唔覺嘅，感覺喉嚨有少少痕，咁我就細細力慢慢咳，唔係大大力咳，佢就會忽然間鎖住，如果一吸唔到氧氣就會窒息，好彩我我而家有『吱吱』（哮喘藥噴劑）跟身，即刻吸，再叫十字車，一路吸住氧氣入醫院，入到去就已經昏迷。原來我係昏迷咗幾日，如果我反應慢啲，冇咗喇！」於是鄧英敏就呼籲長者，如果感到身體不妥，千祈唔好死頂，要打999叫救護車。

鄧英敏指顏國樑今次留醫15日，係一個翻天覆地嘅經歷，顏國樑就話：「頭幾日係全昏迷，原來我嘅氧份太多，令我出現幻覺。咁以前做戲睇劇本知道係幻覺，但發生咗係唔知呢種感覺，今次我剩係俾兩個大媽鬧，捉我又搣我，搞到我好辛苦，又鬧我好曳，成日走身郁，咁我咪郁手，好彩控制到。事後我太太話我知可能啲儀器搞到我唔舒服，想抆喉抆面罩。」之後，顏國樑指自己喺留院期間不可進食，所以未試過咁恨食嘢同飲水。

顏國樑再話：「好彩我太極底打得好，所以翻生好快，有幾次都差啲走咗，可能上天仲有任務叫我做嘢...我而家除咗第一次嘅鱗狀細胞癌冇咗，不過喺另一個地方復發，跟住要做電療，點知中途出現細菌，最少要打7日抗生素，每日打3支，出完院轉個頭覆完診又再入院。醫生都話冇計，因為抵抗力唔夠。我仲以為自己衛生做得唔夠，摸完銀紙同摸完狗又洗手，一日都唔知自己洗幾多次手。

最後佢表示今次嘅「地獄遊」之後，佢好多謝觀眾嘅支持。只要佢一有精神就會同鄧英敏一起做節目。